Kryetari i Vetëvendosjes, Albin Kurti ka propozuar nënkryetarin e LVV-së, Glauk Konjufcën për kryeministër në mandatarin e dytë.

Ky propozim është bërë në mbledhjen e këshillit të përgjithshëm të LVV-së.

Kurti tha se kjo është edhe një shans që të vendi të kursehet nga dy palë zgjedhje.

Ai tha se vetë do të jetë kandidat për ministër të Punëve të Jashtme, për çka ishte propozuar herën e shkuar Konjufca.

“Këtë propozim e bëj për shkak të besimit të madh që kam për Konjufcën, por edhe për shkak që të mos bëhen zgjedhje tjera. Unë marr vendin e Glaukut e Glauku timin”, ka thënë ai.

Kurti ka thënë se vendi nuk duhet të shkojë në zgjedhje pa buxhet të miratuar në Kuvend.

Sipas tij, pa buxhet të miratuar nuk do të mund të mbaheshin as zgjedhjet.

Të mërkurën, më 5 nëntor, përfundon afati 10-ditor brenda të cilit presidentja Vjosa Osmani duhet të mandatojë një kandidat tjetër për kryeministër apo të shpallë zgjedhjet e parakohshme./Arbresh.info